பஜாஜ் பைக்குகள் வாங்காதீங்க - ப்ளீஸ்

                             

   பஜாஜ் நிறுவனத்தின் புதிய பைக் ப்ளாட்டினா 125CC. 110 Km மைலேஜ் என்று விளம்பரபடுத்துகிறார்கள். இதேப் போல 2007ல் பஜாஜ் XCD, 109 Km என்ற விளம்பரத்தைப் பார்த்து வாங்கி ஏமாந்தவர்களில் நானும் ஒருவன். 44,000 ரூபாய் மட்டுமே, செல்ஃப் ஸ்டார்ட், அலாய் வீல், என்ற கவர்ச்சியில் மயங்கி வாங்கிய பின்தான் அவர்களின் உண்மை முகம் தெரிந்தது. முதலில் 70கி.மீ தந்த வண்டி ஒரே மாதத்தில் 65 ஆகியது. மூன்றே மாதங்களில் 60 ஆகிவிட்டது. முதல் மூன்று சர்வீஸ்களை சரியான நேரத்தில் செய்தது மட்டுமில்லாமல் முதல் 600 கி.மீ வரை 40Km/H வேகத்தில்தான் வண்டியை ஓட்டினேன்.

   சிக்னலில் பார்ப்பவர்கள் எல்லாம் எவ்ளோ சார் மைலேஜ் என்று கேட்பதிலே அதன் விளம்பரத்தின் தாக்கத்தை உனர முடிந்தது. என்னால் முடிந்தவரை காப்பாற்றினேன். மற்ற வண்டிகளும் விளம்பரத்தில் சொல்லுமளவுக்கு மைலேஜ் தராவிட்டாலும் இவரகளைப் போல  இரண்டு மடங்கு சொல்வதில்லை. 125 சிசி என்பதால் பிக்கப் நன்றாக இருக்கும். ஆனால் வண்டியின் எடை 112 கிலோ மட்டுமே. அந்த எடைக்கு டிஸ் பிரேக்கும் சாத்தியமில்லை. அதனால் விபத்துகள் அடிக்கடி நேர்ந்தது மட்டுமில்லாமல், முதுகு வலி வருவதற்கான வாய்ப்புகளும் அதிகம். டீலர்களே திருமணமானவர்களுக்கு கூடிய வரையில் இதை வேண்டாம் என்று அறிவுறுத்தினார்கள்.

  இதையெல்லாம் தாண்டி இவர்களிடத்தில் இன்னொரு பெரிய குறை உண்டு. முதலில் Discover 125CC வந்தது. ஒரே வருடத்தில் அதை Discover 135CC என்றாக்கிவிட்டு, XCD125CC என்றார்கள். இதோ, ஒன்றரை வருடத்தில் XCD 135CC ஆக்கிவிட்டு Platina 125cc என்கிறார்கள். இதற்கு முன் Platina 100CC ஆக இருந்தது. இன்னும் சில மாதங்களில் XCD 125CC க்கு உதிரி பாகங்கள் எளிதில் கிடைக்காது. புது வண்டி வாங்கலாம் என்று நினைத்தால், மார்க்கெட்டிலே பஜாஜ் வண்டிகளுக்குத்தான் ரீசேல் வேல்யூ குறைவு. 20000 ரூபாயில் பல்சர் வாங்கிவிடலாம். ஆனால் ஹீரோ ஹோண்டாவின் Passion Plus (வெறும் 105cc) கூட 25,000 குறைவாக  கிடைப்பதில்லை.

  பல்சரை தவிர இவர்களின் எந்த மாடலும் சந்தையில் நிலைத்ததில்லை. போன வருட சர்வேயில் முதல் முறை வாகனம் வாங்குபவர்களில் 60% பேர் பஜாஜை தேர்ந்தெடுப்பதாகவும், அதுவே இரண்டுக்கு மேலான தடவை வாங்குபவர்களில் வெறும் 10% பேர் மட்டுமே பஜாஜை விரும்புவதாகவும் சொல்கிறார்கள். அதை ஊர்ஜிதப்படுத்துவது போல்தான் அவர்களின் விற்பனையும் இருக்கிறது.

  புது மாடல் வந்ததும் அவர்களின் விற்பனை அபரிதமாக வளர்வதை இந்த கிராஃப் குறிக்கிறது.

   பஜாஜ் காலிபர், பஜாஜ் சேட்டக் ஸ்கூட்டர் ,பஜாஜ் M80 என்று சில மாடல்கள் மக்களிடம் வெகுவாய் சென்றடைந்து இருக்கின்றன. அதனால் சில வயதான மக்கள் இன்னமும் பஜாஜ் மீது மதிப்பு வைத்திருக்கிறார்கள். ஆனால் பஜாஜ் நிறுவனம் தனது வியாபார யுத்திகளை மாற்றிக் கொண்டு பல வருடமாக்கிவிட்டன. அவர்களுக்கு  loyal Customers தேவையில்லை. கவர்ச்சியான விலை, கவர்ச்சியான விளம்பரம், கவர்ச்சியான நிதி உதவிகள் மூலம் இளைஞர்களை கவர்ந்திழுத்து விடலாம் என்ற நோக்கில்தான் செயல்படுகிறது.

   சிறு வயதிலிருந்தே எனக்கு ஆட்டோமொபைல் மீதி ஒரு காதல் உண்டு. எனது விருப்ப பாடமும் அதுதான். தாமிரா ஒரு நாள் துறை சார்ந்த பதிவு எழுத சொன்ன போதே இதைப் பற்றி எழுத நினைத்தேன். Platina 125cc விளம்பரம் பார்த்த பின்புதான் இதை உடனே எழுத வேண்டும் என்று முடிவு செய்தேன். சற்று விலை அதிகமானலும் Honda shine, Honda Unicorn ஆகியவை நல்ல சாய்ஸ். ஸ்டைலாக வேண்டும் என்பவர்கள் யமஹா R15 முயற்சிக்கலாம். பஜாஜ் மட்டும் வேண்டாம்.ப்ளீஸ்