எங்கிருந்தாலும் வாழ்க

 

அன்பு நண்பன் ஆனந்திற்கு,

       என்னவென்று ஆரம்பிப்பது? எழுதத் தொடங்கிய நான், நம் வசந்த காலங்களை எண்ணிப் பார்க்கிறேன். சமூகம்,அரசியல், பொருளாதாரம்,சினிமா, என் காதல், உன் காதல், நம் நண்பர்களின் வளர்ச்சி பற்றி எல்லாம் பேசி இருந்தும், இருவரும் திட்டமிட்டே பொறுப்பற்றுக் கிடந்தப் பொழுதுகளே காட்சி தருகின்றன. இனி அவளைப் பற்றிக் கவிதையே எழுதக் கூடாது என நீ கேட்ட சத்தியத்தை செய்த நான், பின்னொரு மழைக்கால மாலையில் கவிதையென்று என் புலம்பல்களை எழுதியதைப் பார்த்தாய். மெளனமாய்  சென்றுவிட்டாய். அந்த பார்வையில் வழிந்த சின்னதோர் மன்னித்தலை மறக்கவா முடியும்?

        திடீரென நிச்சயிக்கப்பட்ட உன் (காதல்)திருமணத்திற்கு கூட நான் வரவில்லை. எனக்கு வாய்க்காத அந்த வரம் உனக்கு கிடைத்ததில் எனக்கு முழு மகிழ்ச்சியே. ஆனால் அந்த தருண‌த்தில் உன் எதிரே நான் வந்து உன்னைக் காயப்படுத்த எனக்கு மனமில்லை. இப்போதெல்லாம் நான் யார் திருமணத்திற்கும் போவதில்லை.

       உன்னை வழியனுப்ப வந்த நாள் நினைவிருக்கிறதா? விமான நிலையத்தில் உள்ள விளக்குகள் எல்லாம் உன்னை வாழ்த்தி சிரிப்பது போலவேத் தோண்றியது எனக்கு. எங்கே அருகில் வந்தால் என் கலங்கிய கண்களை கண்டு கொள்வாயோ எனத் தள்ளியே இருந்தேன் நான். பாஸ்போர்ட் பத்திரம்.. டிக்கெட் எங்கே? ,பெட்டிகள் ஓக்கேவா என பதில் தெரிந்தக் கேள்விகளையே மீண்டும் மீண்டும் திணித்து சோகத்தின் வாசலை அடைக்க முயன்றேன்.இதோ,இன்னும் பசுமையாய் இருக்கிறது நீ கையசைத்து விடைபெற்ற காட்சி.

    இன்று, இந்த நிமிடங்களில் ஒவ்வோர் அணுவிலும் நேசம் நிறைந்து நிற்கிறேன்.என் கண்களில் தேங்கிய துளிகள் உனக்கானவை. நாளை என்பது எப்படியும் இருக்கலாம். என் கண்ணீர் அனைத்தும் காய்ந்து போகலாம்.நீ இங்கேயே இருந்தால் நான் எப்படி மகிழ்வேனோ அந்த மகிழ்ச்சியின் அடர்த்தி நாளை குறைந்து போகலாம். உனக்கும் எனக்குமிடையே திட்டு திட்டாய் ரகசியங்கள் வளரலாம். நாளை என்பது எப்படியோ போகட்டும். இந்த நொடியின் தவிப்பை மட்டும் நம் இருவரும் உணர்ந்தால் போதும் என்கிறேன்.

"திறக்காத காடுகளின் ஒரு முனையில் தொடங்கும் காற்றைப் போல நம் பிறவி.தொடர்ச்சியான அறிமுகங்க‌ளில் இசையாகிறோம்". இறந்தகாலங்களை கனவுகளாய்ப் பிழிந்து கொண்டு அவ்வப்போது ருசி. ஏதோ ஒரு திருப்பத்தில் கை குலுக்கும் விரல்கள் ஒர் இடைவெளியில் சிலையாகிப் போகும்.

நேற்றைய சிலைகளை கனவில் நிரப்பு.
நாளைய சிலைகளின் தகவல் அனுப்பு.

இனிய பிறந்த நாள் வாழ்த்துகள் மச்சி.

*********************************************

ஆஸ்திரேலியாவில் வசிக்கும் இவன் என் மிகச் சிறந்த நண்பன். ஏழுவுக்கும், எனக்கும் மிகவும் பிடித்த நண்பன். இவனையெல்லாம் எப்படி விட்டு வைத்திருக்கிறேன் என்றேத் தெரியவில்லை. நான் பிளாக் எழுதுவது கூட இவனுக்கு தெரிந்திருக்காது. நான் ஓப்பன் செய்து தந்த மெயிலே இருக்கிறதா எனத் தெரியவில்லை.. ஃபோன் செய்து பேச வேண்டும். ஐ மிஸ் யூ மச்சி.