எருமை மாடுகளா!!!

 

    இதைப் படித்து விட்டு என்னை யாராவது திட்ட வேண்டுமென்றால் வேறு வார்த்தை உபயோகப்படுத்தவும்.

எருமைகள் சங்கத்தின் முதலாவது மாநில மாநாடு சமீபத்தில் நடந்து முடிந்தது. அதில் அச்சங்கத்தின் தலைவர் எருமைநாயகம் நிதானமாக பேசிய பேச்சின் தொகுப்பு இதோ..

" காலம்காலமாக ஸ்லோமோஷன் எக்ஸ்போர்ட்ஸ் என நம்மை ஏளனம் செய்வதோடு அல்லாமல் , தமிழில் நம்மை எழுதும் போது 'எருமை' எனச் சிறிய 'ரு' போடுகிறார்கள்.இது நம்மை அவமதிக்கும் செயலாகும். அற்ப எறும்புகளுக்கு பெரிய 'று' நமக்கு சிறிய 'ரு' வா? மனிதர்களுக்கு திக்கான பாலைத் தருவது நாம். ஆனால் எறும்புகள் அவர்கள் உணவையே திருடுவது மட்டுமல்லாமல் கண்ட இடங்களில் கடிக்கின்றன. அத்திருடர்களுக்கு சுறுசுறுப்பு பட்டமா? ஒரு மிதிமிதித்தால் கூழ்கூழாகிவிடும். அந்தப் பொடியன்களுக்கு பெரிய'று'. நமக்கு சிறிய 'ரு' வா? இது பெரிய தவறு.. இனியும் இந்த அராஜகம் தொடர்ந்தால் நமது பிறப்புரிமையான சந்து, தெரு, சாலை மற்றும் நெடுஞ்சாலை மறியல் போராட்டத்தை ஆரம்பிப்போம் என எச்சரிக்கிறேன்.

'எமனேறும்பரியே' என்று காலம் காலமாக சிறுமைப் படுத்தபட்டு வருகிறோம். இது தருமமா? தருமராஜன் தருமராஜன்தான். உயிர்களைப் பறிப்பதற்கு எம்லோகத்தில் இருந்து விரைவாக பறக்கும் கருட‌னையோ குதிரையையோவா பயன்படுத்துகிறார்? மெல்ல மெதுவாக நடைபோடும் நம்மைதானே வாகனமாக தேர்ந்தெடுக்கிறார். மானிடனின் உயிர் இன்னும் கொஞ்ச நேரம் இருக்கட்டுமே என்று நாம் மெல்ல அசைந்து வருவதை உணராத பதர்களை என்னவென்று சொல்வது?

இது மட்டுமில்லாமல், வாகன ஓட்டிகள் பாதசாரிகளை திட்ட நம் பெயரைத்தான் இழுக்கிறார்கள். "டேய் எருமை மாடு ஓரம் போடா" என்ற வசவில் உள்ள ஏளனமும், எகத்தாளாமும், சாலைக்கு நான்தான் எஜமானன் என்ற ஏகாதிபத்திய ஆணவமாகும்.. நிஜமாகவே 'வூட்டுல சொல்ட்டு வந்ததைப் போல' சிந்தையின்றி நடக்கும் மனித ஜடங்கள் ஏசப்பட வேண்டியவர்கள்தான். ஆனால் அதில் நம் பெயரை இழுப்பது எருமையின் அருமை பெருமை தெரியாமல் சிறுமைப் படுத்தும் முயற்சியே. சென்னை நகரத்து எருமைகள் எவ்வளவு அழகாக சாலையைக் கடக்கிறார்கள் என வாயும் வயிறுமாய் இருக்கும் டிராஃபிக் போலிஸைக் கேட்டால் சொல்வார்கள்.

எதிர் சாலையில் ஒட்டப்பட்டுள்ள கவர்ச்சி நடிகையின் போஸ்டரை சுவைக்க விரும்பும் எருமை மாடு ஆறறிவுள்ள மனிதனைப் போல் சட்டென்றா குறுக்கே பாய்கிறது? சாலையோரமாகப் பொறுமையுடன் நின்று வலதுபக்க டிராஃபிக் குறைந்த‌தவுடன் கண்களைப் பெண்கள் பக்கம் மேயவிடாமல் எச்சரிக்கையுடன் நடந்து, சாலையின் மத்தியில் கணநேரம் நின்று பொறுமையாய் கடந்து வருகிறது. இப்படி இருக்கையில் அவசர கொடுக்கை மாந்தர்களை 'டேய் எருமை மாடு' என்று வாகன ஓட்டிகள் திட்டுவது அவர்கள் நம் எருமைப் பாலை அளவுக்கு மீறி குடித்து மழுங்கடித்துக் கொண்ட மந்தப் புத்தியால் என்று சொன்னால் மிகையாகாது.

எனதெருமை சகோதர சகோதரிகளே இவ்வளவு இன்னல்களிலும் நமக்கெ ஆறுதலான விடயம் உண்டென்றால் அது நம்மை மிகவும் நேசிக்கும் லாலு அவர்கள் மத்திய ரயில்வே அமைச்சராகி அலங்கரித்ததே ஆகும். ஆனால் இந்த முறை அதுவும் நடக்காமல் போனது நமது துரதிர்ஷ்டமே. அவரிடம் சொல்லி நம்மை இனிமேல் எருமை மாடு அல்ல 'அருமை மாடுகள்" என்று அழைக்க வேண்டும் என்பதை அடுத்த குறைந்த பட்ச செயல்திட்டத்தில் கொண்டு வரச் சொல்லுவோம்.”

இவ்வாறு எருமைநாயகம் அவர்கள் பேசினார்

**************************

பதிவெழுத தொடங்கிய காலத்தில் எழுதிய பதிவு இது.  ஜே.எஸ். ராகவனின் ஒரு புத்தகத்தில் எருமைகளை வைத்து ஒரு நகைச்சுவை கதை எழுதி இருந்தார். அதை உள்வாங்கிக் கொண்டு என் ஸ்டைலில் எழுத செய்த முயற்சி. ரொம்ப வேலைங்க. அட்ஜஸ்ட் பண்ணிக்கோங்க.