மடக்கிப் போட்ட வரிகள்

 

      அ

தொலைந்தது எதுவென்று

தெரியாமலும்

தொலைந்தது கிடைத்ததாவென்று

அறியாமலும்

இன்னமும் தேடிக் கொண்டிருப்பவர்களை

இன்னார்கள் என்று சொல்ல

இயல்பாய் ஒரு பதத்தைத் தேடி

மொழியின் சுழலில் சிக்கித் தவிக்கிறேன்.

கடவுளின் குழந்தைகள் என்கிறார்கள் சிலர்.

அதுவாயின்

கடவுளுக்கு உடனடியாய் தேவை

மூணு கிலோ அரிசியும்

முன்னூறு ரூபாயும்.

****************************************************

ஆ           

கோபியுடன் வந்தேன்.

தந்தேன்.

முகம் சுளித்துக் கொண்டு வந்தாள்

மனுஷ்யபுத்திரனை

தத்துக் கொடுத்தேன்.

சோர்ந்து போய் வந்தாள்.

இவனை விட்டு யுவனை படியென்றேன்.

சிவனே என்று திரும்பினாள்.

முன்னரே

தபு சங்கரை தந்திருந்தால்

முத்தமிட்டிருக்கலாம்

என்றேன் நண்பனிடம்.

சாரு என்றான் அவன்..

நான் ஒரு பெண்ணிடம் பேசியதை

நினைவுப்படுத்திவிட்டு திரும்பினேன்.